كلمات قصيدة ارجوك متتغيرش لفارس قطريه
سألني صحبي ف يوم شتا وقالي ب هدوء
عامل ايه ي عم
بقالك كده مش مظبوط ومتغير عن العادي
وكل م بسألك مالك تقولي انا فل اهو عادي
بتشرب بن ب استمرار
معدش يجيب معاك مفعول
وساكت ف الهزار علطول ومتاخد كده وهادي.
تكونش عرفت واحده جديد وبتنكد عليك يعني
وحتى لو انت متنكد ف مش موضوع وايه يعني
مطول عمرك قليل الحظ لا ليك ف الحب ولا غيرو
ماتنطق يبني قول فيك ايه
ف رديت قولتلو كبرنا وهم الدنيا خدنا عليه
م كنا عيال ولسه جمال لا نعرف هم ولا نيله
م كنا ي صحبي خفافي ليالي عمرنا طويله
بنسهر حبه نلعب حبه نتمشي ف اي مكان
ومش من فتره ده امبارح خدتنا الدنيا تغفيله
صحابنا اتفرقوا ل صفين ومفضليش ونيس الاك
ووجعي من اللي حبيتها اللي باجي واطلعو ونا معاك
تدوم القعده يبو عمو ويدوم حسك ده بالدنيا
وقد الدنيا وعنيا تروح لو يطلبوها فداك
محوشتش سنين غيرك وجدعنتك وتقديرك
ونمت ف بيتي واكلنا واكلنا ونمنا ف سريرك
َثابت لسه على وضعك ولا اتغيرت عن طبعك
خانتي الدنيا والايام ومنصفنيش صحيح غيرك
يابخت الواحد ان قابل صاحب ذيك ميتغريش
وجيتلك ياما واشهدلك ي صحبي ان انت متاسرش
لا رديت ايدي ولا مره ولا خليتني اروح بره
ومهما وقعو بينا وقالو كلام متتاسرش
دي تحويشه سنين عمري اللي راحت مني ع الفاضي. مفيش ولا مره اقول محتاج ترد تقول مش فاضي
كبرنا ي صحبي والدنيا بقت اوحش وهمها ذاد
وربك بس من كرمو رمانا لبعض ف انا راضي
فاكر البنت اللي حبيتها وقولتلي يومها مش حباك
لا من توبك ولا شكلك ولا طباعك ولا شرياك
وكدبتك وحبيتها وخدت الكف على وشي
وجيت تاني يوم وبشكيلك بتضحكلي ضحكت معاك
مليش غيرك يا صحبي دليل وعكاز ليا وقت ما ميل
نقاسم بعض ف المواويل وفالايام وحتى الروح
صديقي وعشرتي وصحبي ورفيق السكه فين م بروح
وبتهون على الواحد سنين بيعشها وسط الهم
ولا انت ابن امي ولا ابويا ولكن فينا نفس الدم
زمان شلتنا كات ياما وفيها صحاب كتير جدا
والوقت اكتشفت ان الصحاب بالوقت مش بالكم
كبيره الكلمه وتقيله ميفهمهاش غير الجدعان
صحاب يعني سند وحياه وناس ف الخوف يكونو امان
لا بالاعداد ولا الاعدات ولا الخروجات ولا الأوقات
وصحاب اصلي واحد بس يغنيك ٢٠٠ انسان
ف بتمناك متتغيرش وتفضل ذي م انت أصيل
واشيلك لما تحتاجني ولما اشيل اخويا يشيل
وعلى قد المعزة ي ذوق نقاسم بعض ف المواويل
ونحكي ذي م بنحكي ونقعد ذي قاعدتنا
وأفضل اجي على بتكم وتفضل تيجي على بيتنا
ونكبر قد ما نكبر وبرضو عيالنا تتصاحب
انت اجمل حاجة ف الدنيا بكونك بالاصول صاحب
وعجبي
تعليقات
إرسال تعليق