كلمات قصيدة اشبعي بيهم لعمرو حسن
اشبعى بيهم
اقعدى يوميا وسطيهم
ادخلى كافيهات
املوا السينمات
احكوا فى حكايات
و اتمشوا ساعات
و اعملى لحظات و افرحى بيهم
الناس اللى انتى فى احضانهم انا من ليلتين لسه راميهم
و ابقى اتكلمى عنى زيادة
الصوت و النبرة المعتادة
و اضحكى و انتى بتوصفى شكلى و انا ببكى علشان ناس فارقونى
دخلى فى حياتك كل الناس اللى انا قربت و خذلونى
و اشبعى بانصاص على الترابيزة القعدة مع التافهين ميزة
لا هتحكى عن الاحلام بكره
ولا تمشى سكة من التفكير
ولا هتدورى على بيت و سرير و حياة و كيان و امان باقى
فيه بنات بالفطرة تسيب راجل و تسلم وقتها لبواقى
اهى جتلك فرصة متتخنقيش
ايام ببلاش بتعديها
فيه ناس بتعيش و تموت زيك
تقعد و تقوم و تقضيها
وانا مش هشرحلك لو لعبة اتزهدت يحصل ايه فيها
كترى مكياج اقسمى نفسك بين الكافيهات
افتكرى ان انتى كسرتينى للمة نفايات
بكره مع الوقت هتكتشفى ان انتى يا دوب كنتى وسيلة
غنواية و قعدة و توصيلة
برواز الوان لجل الليلة
و كمان كام يوم يعملوا غيرك
ان كان على السر اللى فضحتيه كتر خيرك
انا و الله مسامح خالص
زعقت معاكى و خونتينى فاعتبرى ان حسابك خالص
و انا مش زعلان
انا كنت لكنى خلاص مبقيتش
يكفينى ان انا حبيت واحدة و طلبت وجودها لكن مرضتش
ادتها القمرة حليب صافى
و مشيت و ايديها على كتافى
عديت على الجمر طريق حافى
ولانى هصونها فمنبسطتش
دلوقتى بقيتى بتاعة الكل
زى الفل
مبسوطة و راضية و مرتاحة و جميلة
شبعانة مساحة
افرحى بحياتك كمتاحة
و انا مش هحزن انى عرفتك
انا لسه بحالتى و كلى ايمان
ان انا استاهل بنت حلال
و الفرق اللى ما بينا لا يمكن يتصلح
ولا يمكن يتقال
روحتى على عيال تعملى صاحبة
و انا املى فى صاحبة و ام عيال
انا املى فى بيت و خناق و عيوب
املى فى خلافات بالوقت تدوب
و فى واحدة تخاصم و متفجرش
ان كان الغطا سترة و ضلة
فالغطا بيكى يضل ميسترش
و انا اسف على كل محاولة
على الحرب الخلصانة بجولة
كان نفسى تكونى انتى الدولة
انما غلطان
انا هرجع زى ما لقيتينى
مكسور بتعالج من الايام
يمكن نتقابل
و هيحصل
و نشوف مين فينا مشى لقدام
هتعدى عليكى سنين تانى
تفضلى بتزيدى و بتعيدى
و هقابلك على حطة ايدى
لعبة بلاستيك فى كافيه بالليل
بتدور على الناس و بيرموها
فيه ناس زيك بيهدوا حياة
و فيه ناس عايزة حياة يبنوها
تعليقات
إرسال تعليق