كلمات قصيدة أمي لعمرو حسن
لأمي مطلع البدايات
وأول ما نمي ف الذات
لأمي وحدها بالذات
شجر طارح، عياط مالح، وعزف نايات
اقول امي يحركني الحنين لحنين
وتسحبني السنين لحاجات
ايدين دافيه في ليل بارد
عيون صافيه وبال شارد
ما هي الوالده والوالد
وهي الضل والعتبات
لأمي وحدها بالذات
كبرت كتير واخدتني الحياه منها
واخدتني الليالي الحالكة والحكايات
بعيش وحدي لامن امي خيال بيمر، دعا بيسر
اغيب عنها واقول انا حر
اطارد وهمي وغيابي ف ادوق المر
تقول طيش الشباب بيغر
عتابها يقولي ايه بيفيد وايه بيضر
انا وامي مابينا تاريخ من العتابات
ببات بردان في بيت واسع
حنين لاسع، فضاء شاسع
لا حد يقولي قوم اوضتك
ولا في ايدين تغطيني من البرد اللي حواليا
بنام بالساعه في ايدايا وبهدومي اللي جاي بيها
بقيت القى الهموم تكتر فعديها
تعبت يا أمي
ايامي بقت تتعاد
كبرت يا أمي بقى عندي حاجات اكتر اغطيها
بقيت برمي الحاجات ع الارض
وبنسي يوماتي اسقي الورد
بسبب الحاجة في التلاجة بالأسبوع
وبشبع لما اموت م الجوع
وبدلت الفرح بدموع
كبرت يا أمي صبحلي تاريخ مع الايام
ومش حاسس هدوء وسلام
هنا أعداء، هنا كوابيس، هنا اشواء، هنا متاريس
هنا وهناك ونا بدونك
غيطان غربة وليل ازمات
انا اسف على الغيابات
مفيش انسان بيختار الغياب ب اديه
انا ابنك وعرفاني وعجناني وخبزاني
وعارفه ابنك إذا يبعد بيبعد ليه
بلغني انك بقيت بتحب!
ونا عرفاك إذا حبيت
يزيدك يابني ويصونك ويديك العيال والبيت
واشيل منك ولاد شبهك ميستغنوش كما استغنيت
انا استغني؟!
هو يا أمي في مغني بيعرب عمره م المغني
انا لو كان ب ايدي قرار
اكون جنبك في ليل ونهار
واعوض كل احضانك
وابدل كل أحزانك
واكون ايدك، واكون رجلك، واكون والدك، واكون نجلك
واعيش ضلك بكل ثبات
لولاش بس الحياه سارقة
وعين الأمنيات زقة
مكنتش عمري خليتك
مفيش في الدنيا دي انسان يحبك كِيف ما حبيتك
ولا حسو بسلام وأمان كإحساسي ونا في بيتك
انا عارفة وروحي معاك
و عارفة انك عبيط لك قلب
بعدي الناس ومتطلبش
تبات في الظلم ومتظلمش
اكيد القاهرة القاسية خدت منك وخليت بيك
يحنن يابني قلب الناس معاك وعليك
ويكفيك شر بنيأدام بيحسد اي خير في ايديك
وحشتيني يا ست الكل
يا عود الفل وحشني دعاكي في الأيام يقويني
دوا الكحة ومتدخنش وتقل وانت في الشارع وخد بالك متستهترش
وسيبها لربنا يابني ومتفكرش وحشني الاكل ونا راجع وصوت عمران
وقعدتنا في ليل رمضان ودمعك وانتي بتعدي غياب احباب
يا اجمل صوت وأوسع باب يا ايد من المستحيل تنساب يا فتحت قلب ع السموات
وحشتيني ونا اسف على كل اللي دونك فات لأمي وامي وحدها بالذات
تعليقات
إرسال تعليق