كلمات قصيدة محبتنيش لعمرو حسن
محبتنيش
بلاش اكدب
ولا ابرر ولا اصوّر لروحي الوهم
هيفرق ايه سبب موتي يكون برصاصه ولا بسهم ؟
كان لازم بنفسي احس
كان لازم ب عيني اشوف
اقابل وشها البارد
بقلبي الشارد الملهوف
اغنيلها
واعيش ليلها
واقدّف مركبي ف نيلها
واراهن بالورق كله على اخر رقم كسبان
ماحبتنيش
برغم اني وكتاب الله ماقصرتش
ويوم ماقالتلي عايزه اعرف ما أنكرتش
ويوم ماقالتلي زعلانه
مابررتش
معاها كنت انا التاني وابدّيها
بنقص من حياتي حاجات وبدّيها
ولما تمدلي ايديها
امد ايديا ماسحبهاش
ماحبتنيش وحبيتها
ودايرة تقول ماحبتهاش
غريبة القلب وعمايله
ده انا لو كنت بعاديني ماكنتش هامشي ناحيتها
ولو جوايا بكرهني ماكنتش عمري حبيتها
مشيت سايب ايديا وبس
انا يمكن فراغ عادي
بديل القعده ف النادي
رواية بس ليها ايدين
ويمكن كنت توصيلة
ونقطه بُعد لعلاقتين
ويمكن كنت بالنسبالها تكفيره
وعرفتني تسدد دين
ويمكن أي شيء تاني اكيد عارفاه
ماسألتشِ وهي بترتكب حبي
وايه ذنبه اني ابقى معاه ؟
ماحستش بذنب ازاي
وهي بتتهم فيّا
وترميني بتهم ظالمة
بتطلب مني اطفي النور وتتخانق عشان ضلمه
وطول الوقت بتخانق
وبتفاوض
وبتراوغ
وبتراود
وبتعاير
وبتندّم
كإني بمشي وانا واقف
وفاكر نفسي هاتقدّم
واديني جريت لحد ما روحت للاخر
ماحبتنيش
وسايباني شعور ميّت
اشوف ايه ف الحياه يتعاش
بـ اعِّد خسايري وانا خارج
دموعي وخوفي ومشاكلي
وايامي اللي راحوا بلاش
لكني باقول انا راضي
واحط الجملة دي قصادي
ده ذنب وجايلي م الماضي بدعوة واحدة مابتنساش
تعليقات
إرسال تعليق