كلمات قصيدة من يومين شوفتك معاه لعمرو حسن
من يومين شوفتك معاه
كنتي ضهرك ليا وعنيكي ف عنيه
طفل مش مني ف اديكي
دبلة مش ليا ف ايديه
كنتي ثابته وبنت نفسك
انكسر ضلي ساعتها والبشر مرت عليه
كان ب ودي اعتزرلك
حتى اقولك عامله ايه
بس سايب قلبي دقة
لما عقلي قالي لا
دي النهايه المستحقة لحد ساب ومقلش ليه
وافتكرتك ونتي جمبي
كنتي بنت أصول وصالحة
عامله مع روحك مصالحة
كنت بستغرب مشاعرك
ف الفرح الاقيكي وردة
ام معجونة ب طفولة
ف الألم الاقيكي ثابتة
تسندي ضهري بروجولة
تلحقيني كل مرة
كل مره تبقى سابقة خطوة عن كل اللي جنبي
كنتي تتحبي الحقيقة
بس أنا كنت أعمى فعلا
كنت بهرب بالطريقة
مرة اسف
مرة خايف
مرة لين
مرة ناشف
مرة مش عارف اكمل
مرة مش نافع أجمل
عيشتي شايلة وعشت احمل
لما فاض الكيل ف روحك
للأسف كنتيلي دنيا وكنت أكبر ناس جروحك
مين يجيب اللوم عليكي
ونتي كل ما فيكي طيب
ده انتي حتى الاه مكنتيش بتقوليها
كل حاجة عشاني كنتي تعمليها
لسه فاكرك ونتي نازله ف وقت متأخر لجل تجبيلي الدوا
وأما اقولك دول شويه برد يعني كحة من لسعه هوا
تعمليلي ام بتزعق ف عيل
قولتلك تلبس كفايه
برد طوبة مش قليل
وأما ابوس ايدك تقولي طفل مزعج بس طيب
كان عليكي نشان براءة
عمره مرة مكان يخيب
كنت ماسك ايد جنينه
عيله ف تانيه ابتدائي
مش صبية مخلصه جامعه وقوية ليها شخصية وكيان
انهاردة انا كنت نقطة واقفة بين أصبح وكان
وأما خفت لحد ياخد بالو مني ف المكان
خدت بعضي وروحت ماشي
زي شجرة بدون فروعها
كان ف ضهري عمر فات
بنت ولا كل البنات
كان تاريخ كامل ورايا
ضحك وأغاني وسلام
صمت ومعاني وكلام
كوكب الأحلام بحالو كان ورايا
كنتي واقفة هناك معاه
وكنت بتمشي معايا
كان ضروري تشوفي حالك
عين بسيطة ومرتحالك
اب للحزن اللي جالك لما سبتك واقفة واحدك
كان طبيعي اني أسقط ف اللي انا جربتو بعدك
فين هلاقي حد زيك
زيو زيك
لونة لونك
انتي أطهر من معاشرة شخص كان عايش يخونك
ي بمشاعره
ي بهروبه
ي بمحاسنك
ي بعيوبه
لو مكنتيش انتي فرحانه وسعيده مين تكون
مين تكون الأم للطفل الجميل ده
مين تكون ضفايرها دلتا
وحضنها صافي وحنون
الحقيقة
كل شيء كان شئ طبيعي
زي م الخوجات يقولو فير أنف
شخص فرط لف كل الكون ده لف
واحدة زيك ليها اسره
مش هكملها بحصرة
أو هقول لو كان هيبقى
بس هدعيلك ك طفلة وأم سابقة
تيجي بنت تشيل ملامحك
طير ميلقتش الا امحك
مطرة صافيه متنتهيش
ربنا يفكرني بيكي
وتفضلي متفتكرنيش
تعليقات
إرسال تعليق