كلمات قصيدة مرة واحد نوفمبر لعمرو حسن
تعرفي يا خلود
مرة واحد نوفمبر
نوفمبر! واقف ع الأبواب
والواحد بيدور علي زنب مناسب قبل الشتوية م تعمل ف القلب سحابة
والواحد بيقسم نفسة بما يرضي الله
ع الخوف واللمة الكدابة
وبيدفع فواتير الايام اللي معشهاش
بقى عندي يقين إن اللي بيهرب طول عمره بحاجة عملها بيعيش طول عمره يكفر ف حاجات معملهاش
ونا عندك اهوُ
عندك اهوُ انسان مخدوع
بيبص على الحواديت من خرم الباب
وبيمشي برجله تجاه الحزن المجاني
كل م يخرج من جرح قديم يدخل تاني
تعرفي يا خلود من 7 نوفمبر 2014 ونا بلعب مع أطفال لسة محصلوش
وبنام على كتف مبلمسوش
من يوم 7 نوفمبر ونا بخرج فيلم بدون بطلة
وبوارب باب البيت علشان يدخل أبويا واحكيلة الحاصل من يومها
إنما يا خلود وكأن رصاصة من الايام الفايتة عَدِت جمبي ودخلت ف الوقت
لا انا عارف احدد مصدرها ولا حد مصدق إحساسي
ايام بتمر
ايام بتمر شبه المية ف ايد الأحداث
ونا مش اكتر من مانيكان ف الفيلم الهاذلي اللي اسمه الناس
زي المصدوم بيصب الشاي على كف ايديه وبيشرب كُبايته الفاضية
زي المخدوع يتأكد من قفل الترباس والباب مفتوح
جرا ايه يا خلود
هو انا كل ما ابطل اعيط اضحك بدموع
ايه يا نوفمبر انا كل م اقولك على حاجة يطلع خالد حماد عارف
اَدِي المزيكا اللي بسببك خرجت ع الناس سرب مواجع
الليل واجع والذكرى كمنجة مبتسميش
إنما تعرف
العين اللي متبكيش بليل كافرة
والرِجل اللي متمشيش ف الشوق أَولىَ متمشيش
فكرت
قولت
سأوي إلى جبلٍ يعصمُني من الحزن
بس الطوفان لم البكي من كل زوج اتنين
اَدى نوفمبر احساس بالدفي ف عاشر أيامه البارده
وعنيكي اللحن اللي بليغ حمدي خباه م الناس واداه لواردة
وحدهم الناس الشتويين هما الفاهمين انا اقصد ايه
اسألوا شبابيك ورا منها النور
ومشاعر عايشة ف دهر السور
مناديل مبلولة غياب وعتاب
عشرات الفناجين اللي اتقلبوا لأصحاب
ملعون اللي اتسحب من غير م يقول ولحد الان بصمة ايده معلمة ف الباب
وأهين ياليل وأهين
هتاخدنا لفين
مرة نوفمبر
مر نوفمبر والتاء مربوطة ف رقبة مين
وكأن رسايل البحر السري اللي داؤد كان حابسه بقاله سنين
يحي مقررش يعيش نورة
إنما تلعطلو من الايام ذي العفريت
عدت قدامه بشمسية ف مطرة لياليه
اكتشفت سره اللي مخبيه
فتحت روحه ف حضنها بليل مبقاش بيتهته وياها
ونا يحي اللي بينسي وجوده إنما مش عارف ينساها طب اعمل ايه
انا
انا عاوز اكون مطرح أَمِن لشعوب شبهي
لشعوب بترد الباب من غير م تقول كان في واحد مبقاش موجود
انا عندي اموت ولا اني اشوف النظره اللي ف عينك يا خلود
ونتي بتتأملي وشك ف الشاي
وتشوفي حضارتك بتعيط على ايد مُحتل
نبهتك مرة زمان مِنك
قولت إن مفيش علاقات بتدوم بين جرح وخل
إنما ده نوفمبر يا حبيبتي
الشمسيات عمرها م هتقدر ع المطرة لو جت من تحت
ونا شكلي سرحت
فكرت البوح هيريحني
انا شكلي سرحت فكرت البوح هيريحني
وأديني دوشتك ب سُكاتي
فرجتك على فيلم حياتي ف قاعدة ساعتين
النور كلها حَبة ويطلع
ونا ونتي هنصبح عكس السير
كل نوفمبر وإحنا غلابة بنحن ونتعكز ع الغير
بنشوف القشة تنجي غريق
وبنمشي ف كل مكان وطريق
ونقول بليل تصبح على خير
كل نوفمبر ونا ونتي بنؤمن ب الابراج
وبنتشائم مع كل تلات
وبنتشارك ف الاغنيات
نعمل قدام الساقية نايات
ونبص لبعض ومنغنيش
بكرة نوفمبر يجي حنين
ونكون مع ناس تانيه متإذيش
يمكن في حاجات عايشة وبتموت
ننده لحاجات بتموت ف تعيش
يمكن
يمكن يا خلود
تعليقات
إرسال تعليق