كلمات قصيدة خمس مشاهد لعمرو حسن
1
اهلك واقفين قدام الباب وممرض واقف عند دولاب تقريبا بيحضّر حُقنة
خالك بيتابع م التليفون، وأبوك بيرتل م القرآن سورة الإنسان وبيدعي لأمك تبقى تمام
ف الكدر يبان منظر حمّام وريسبشن واقف فيه صفين
ف الخلفية صورة الريس واقف متحنط بين عَلَمين
وف آخر الطُرقة ٣ ستات بيجيبوا حاجات ويودوا حاجات
وف وقت معين وف ثانية
خرج الدكتور بشهادة زور ان انت بتضحك للدنيا
2
ميس نادية جلال واقفة بتشرح قدامها عيال وانت م بينهم قاعد محتاس، اتفضل قوم جاوب على طول، تتلغبط وقت م تيجي تقول، يضحك واحد من آخر الفصل، تُحرَج جدًا وتشيل جواك، إحراجك هو الباقي معاك من طفل قديم كان يشبه ليك
تعرف معاليك! كان شكلك أجمل من دلوقت، غيرك الوقت، بدِّلك المشهد والتفاصيل، والفاضل منك نص قبيح ديمًا بيفوز على نص جميل
3
هو وهي وبتاعة الورد، حضنها دافي وبينشع برد
الناس محشودة بفعل الجرد، بيقرب منها وهي بعيد، بيبان ف الكدر اتنين ظباط، ويبان ف الصوت تهريج وعياط، وبطاطا بتلبس بالطو شياط وبتدفن روحها بدون أسباب
واقف قدامها، إيديك ع الباب وعينيك ع الشارع والماشيين، خايف من مين؟
خايف على مين؟
كلها كام يوم متكونش معاك، وتكون مع غيرك عند النيل، هي وهو وبتاعة الورد، حضنها دافي وبينشع برد
الناس محشودة بفعل الجرد، بيقرب منها وهي بعيد
4
شكلك عجزت
مبقتش خلاص عارف ترتاح، مشروع طائر باقي منه جناح، ومعاك أسرة بتعرف ترضيك وتعذب فيك، معاك أولاد شبهك بجنون ف المنظر اه مش ف المضمون، ف الأوضة مراية بحجم عينيك وهدوم أحلامك واسعة عليك..
تضحك والشيب بيعاكس فيك والدنيا بتلعب بيك طاولة
فاضل ف الروح آخر جولة
فاضل من كل الماضي حاجات
شارع وبنات مجاذيب وذوات وأزايز خمرة وصُحبة سوء وتاريخ مسروق واغاني كتير ملهاش اصحاب
الماضي بعيد كأنه سراب والجي سراب هيكون ماضي
ف يدور زمبلكك ع الفاضي
5
للمرة التانية.. اهلك واقفين قدام الباب، وممرض واقف عند دولاب تقريبا بيحضّر حُقنة
بنتك بتتابع م التليفون
وأبوك بيرتل م القرآن سورة الإنسان وبيدعي عشانك تبقى تمام
ف الكدر يبان منظر حمام وريسبشن واقف فيه شخصين
ف الخلفية صورة الريس نفس الريس واقف متحنط بين عَلَمين
وف آخر الطُرقة ٣ ستات بيجيبوا حاجات ويودوا حاجات
وف وقت معين وف ثانية
خرج الدكتور مهزوم بيقول ان انت بتخرج م الدنيا
تعليقات
إرسال تعليق